Ai 21 de otobre de sto an sarà passà 40 ane da canche Marino Bianchi Fouzigora, anpezan de pare de Zubiana, l é tomà 'sò da ra Zima del Lago, na croda che varda l Lago del Lagazuoi. Marino l ea del 1918, e l ea trenta ane che el 'sia in croda, da Cortina fin 'sò par r Africa. Ignante ra guera l aea fato gares de schie; dapò l ea stà Presidente del Sestier de Cortina; inze i ultime dis el louraa drio ra sejovia noa in Potor, e l aea tante amighe. El so gnon l i é stà dà a na ferata che ra rua su su ra Zima de Meso del Cristalo, a una ponta de ra Croda da Lago, a na gara de schie che da tante anes i fesc d ausciuda su in Sennes. Ades che l é passà iusto 40 ane, m é vienù r idea, che chi de ciasa soa i à azetà vorentiera, de scrie un libreto su ra vita de Marino, ra so crodes, chel che l à fato par el 'sì in croda. Cade poco scomenzarei l libro, e ei beleche un grun de idees da bete 'sò. A scomenzà da chel che me penso de sta guida canche, daante l ufizio de ra Guides in Piazeta San Franzesco, m aee fermà a domandà ci che l era morto, e propio el m aea respondù che i aea tocià a un de lore, Ivano Dibona. Chel on outo, magro e bijo che l m aea respondù duto pascionà a mi, un borson de diesc ane, con chera paroles, l ei in mente come se fosse agnere. Ei scrito de el inze l prin articolo da “jornalista”, sul jornalin de ra scora “La mia valle”, del '70. Ades, dapò tante anes da chel 21 de otobre del '69, ei voia de bete insieme sto libro par recordà polito Marino, e fei calche bel pensier par un on che a Cortina el no n é stà desmenteà.
Nessun commento:
Posta un commento