Anche del 2008, conpain de ogni an de chesto secolo e de chi che vienarà, ciaton un grun de dis natalizie de ra nostra storia. Pede i 125 ane da canche i à daerto l prin refujo in Anpezo, el Sachsendankhütte su in son de Noolou, l é anche 125 ane che l é morto ra prima guida inze na desgrazia: Bepe Ghedina Tomasc, tomà ‘sò propio in chel dì (ai undesc de agosto) dal piazal daante l refujo, negun sà polito parcé. Dis natalizie, dapò, in é anche trope outre, ma fosc in on un che l passa daante dute. Ai 29 de luio l é zento ane iuste da canche l é morto a Viena, de setanta ane, Paul Grohmann, avocato che dal 1862 e par tredesc ane l à zapegà incainlà par duta ra Dolomites e, co ra nostra guides, l à darsonto par prin un grun de ra zima pi outes: sun chel de Anpezo, ra pontes de Tofana, l Cristalo, l Sorapisc, e nossicuanta outres ca daejin. Me sà che see un di natalizio che sarae bon recordà, na ocajion no solo par chi poche che conosce e s interessa de ra storia de ra nostra crodes. Grohmann l é stà un gran pionier anche par chel che na ota l aea gnon el concorso dei forestiere. Dijon che, da canche l é passà da sta bandes e co ra sò ranpinades, i scrite e i libre che i à fato conosce ra Dolomites e Anpezo in duto l mondo, ca l à scomenzà a ruà ra ‘sente! Del ‘63, l Comun el s aea dà da fei par recordà i 100 ane da canche Grohmann, con Checo da Meleres, l aea darsonto par prin Tofana de Meso, ra nostra ponta pi outa. Inalora i aea betù aduna un libreto e soralduto i aea intestà al pionier chel toco de strada intrà ra pistoria del Tinele e ra ex Cassa Malati. Ben, spero che via par st istade, i no se desmentee de chesto gran on. Paul Grohmann el merita de seguro de esse recordà dai anpezane e da ci che passa da chesta, asache chel 29 de agosto del 1863 el e l vecio Checo da Meleres, fosc zenza gnanche s inacorse, i à daerto ra porta del doman de sto paes.
Nessun commento:
Posta un commento