lunedì 21 luglio 2008

Stories curtes curtes (par anpezan, da "Bestiario d'Aial" di L. Russo e E. Majoni, Cortina d'Ampezzo 2003)

Inze l spigo de ra val d Anpezo betù a mesodì, intrà un troi e l outro, vive in pasc un grun de besties. De alcuantes vorasson ve contà algo.

I touroi
I stà su par chera bances sote ra Rejina Rocheta, ma i è tropo pi grei de chi che conoscion: ra 'sente disc che l é colpa de duto l zigar che i roseea. Inze i sasc i à jaà buje grei come zuches e là inze i sin và a sosta canche scomenza a gneegà. A chi crepe, agnoche i à ciasa soa, i disc Crepe dei Touroi. Nosoutre i touroi no i on mai vedude, ma i sò buje scì, alora vo dì che i é.

I moscite
Canche sora Posuogo rua neola negres da tenporal, l è senpre da sperà che see neoles de moscite che i và d amor. Solo che de ra otes sperà no 'soa e scomenza a pioe dassen.

Ra jarines
Ra jarines es a ra piuma bianches come el gnee e es stà su sun chel col cuerto da l bosco daante l Bèco de Mesodì, che da eres l à ciapà gnon Col Jarinei.
Canche ra notes es é pi scures, es sin stà de fora, sul pra daante l cason, mucete intrà i brascioi negre, e es somea tante lumis inze l scuro. Coscita ra vecia acuila de Sonforcia, oramai deboto orba, canche ra torna da ra caza, ra no se perde.

Ra orties
Ra orties es se sfrea ra foies che beca una su r outra, e coscita es à inparà a ciantà. Ra Val d Ortié, ra sò val, ades r é manco pascionada.
Grazie a Lorenza per il lavoro fatto insieme!

Nessun commento: