Su par ra fazada daante ra Ponta de ra Crosc, ca de ca de ra Ponta Fiames ves Anpezo, i prime a se ranpinà su l é stà Tino Verzi (Sceco) e Jan Siorpaes (de Santo) con Felix Pott, d agosto del 1900. Un toco in su l é na gran tacia de erba e de barance, che se vede finamai da Bigontina. Inze l libro “Dolomiti Orientali”, lieson che ra tacia, un zentener de metre sora l graon, che na ota i conoscea, parceche se fermaa proprio là a se bete i scarpete ci che tacaa l paré, e agnoche ades i passa de poche, i ra ciamaa “i barance del Banco”. Cal banco che see no sei, ma almoto in calche luò chel gnon l ea stà sentù e tolesc par bon. Orazio De Falkner, tornà su par prin drio Pott de ottobre del 1900, l disc che a ra tacia ra so guides es i ciamaa “i barance de Santo”. “Non so il perché …” del gnon, el disc, ma l é seguro che Santo fosse chel da Sorabances, sa pare de Jan, morto de dezenbre del 1900, che fosc lassù el no n aea mai stà. Ci alo rejon? L é un toco che vorarae capì se Santo da Sorabances, ignante de Pott e del 1900, l aea mai abù algo da che far con chera tacia, na pousa verde al soroio agnoche ancuoi và su solo chera poca ciamorzes che l é vanzà là dintor, o almanco ce banco che l i ebe dà l gnon a na barancera che poche conosce.
Nessun commento:
Posta un commento