Lassù, sote l col che i ciamon “El Picheto”, agnoche fin ‘sà alcuante anes l ea doi gance par se montà, na ostaria che r é deentada un restorante epò un ciasamento de lusso e tanta ‘sente che ‘sia coi schie, propio sun chi “canpete” agnoche ci che scrie, e trope come el, i à inparà a vienì ‘sò a spazagnee par el toco, l inverno passà i à daerto un local. El “Bar Pierosà”, che Paolo Bellodis Smalzo el s à insonià par undesc ane de vede fenì, l à fato ormai ra seconda stajon e l tienarà daerto deboto duto l an (ma via par l istade, Paolo, guida dal 1984, l à dito che el no po fei demanco de ‘sì in croda). Inze l piazal de Pierosà, cuatro pasc sora ra stazion, l é vienù su na ciaseta noa che ra sà da larià, con funestres da agnoche se vede fora ra val intiera. “Ogni funestra ra somea un cuadro” l à dito Paolo, canche l m à fato vede ra so fadia. Inze l Bar, projetà dal architeto Gretchen Alexander e fato su dai marangoi Majoni de Mano, l é toura pizores e cuadrates: sun duta ra plotes l é fotografies de crodes in bianco e negro, una pi bela de cher outra. Cardee de saé assei del mè paes, ma does no son stà bon de capì agnoche es é stades tolestes 'sò, e m à tocià me l fei dì da Paolo, che ra val el ra ’sira da anes anche el! Canche te te scentes, daos t as duto l Pomagagnon, a man dreta Tofana, visavì ra Tores de Potor, co r Ingleje che somea un corno, e pi indalonse Croda da Lago, ra Rochetes, insoma dute chi merle de dolomia che insoasea ra nostra val. Cemodo podone pensà che un sito coscita el no feje ra voia? A Pierosà và su vorentiera forestiere e anpezane; l é piaza da ‘suià pa ra famea, fin che mares e pares i ciapa l sol; l é da magnà e da bee. Ci che i piaje ra crodes el po fei doa ciacoles con Paolo, "Schirata" e ex Capo del nosc Socorso; Corso Italia l é coscita pede che vo esse manco de diesc menute a pè: ma fosc l é meo restà lassù fin che l sol el và a fiorì. Te sos pede ra ciases, ma te somea deboto de esse intrà ra crodes. Brao Paolo, e bon laoro!
Nessun commento:
Posta un commento